面對"歷史"

今日一個人响屋企處理一堆積咗好鬼耐都未得手閒去搞嘅電腦數據的，悶極無聊聽ＣＤ．

ＣＤ機傳唻林億蓮嘅舊歌－寂寞流星群，忽然令我諗起公司裡面一個女同事嘅失戀故事．

我相信大部份人都面對過失戀，不論係飛人定比人飛，總有佢哋當中嘅理由．邊個先提出分手有傷勢八折甚至更低的優惠；反之另外果位就可能要咩住條九出十三歸嘅數，流晒淚喊晒口咁諗返果個大耳窿開頭點好點好，而後來又點衰點衰．

對唔住，我冇能力去教果位女同事點愛點愛，因為我而家都仲學緊．但係好老土地都要講返句，從來"歷史"都祗係會愛嚟讀，同埋用嚟比人日後做翻舊賬嘅証據(不論是好是壞)，"歷史"係唔會攞嚟喊嘅．無論你八九年六月有過幾熱血有過幾偒心，今日睇返轉頭又係乜嘢一回事呢？

究竟點樣先叫做"成熟"呢？我諗可能就係面對"歷史"時處理佢嘅一種態度罷了．呢種態度叫做"放手"，英文叫做"LET GO"．

"不要愛　無法愛上的畫　任我怎麼欣賞他　都不要到處掛！"　－節錄自 寂寞流星群 一曲