OHM"不"日記

Dream Couple (下集上半場)

2006-10-09T23:22:00.000+08:00

謬論下半場上集如下

銀行男的壞處：
壞處(1):隨住銀行開始七日上班制，銀行男都會難逃要返星期六日．
破解：空姐女都會返工不定時，時飛時唔飛．所以冇得夾一齊唔洗返星期六日．但係weekday一齊放假就返而有得諗．尤其可以响平日返堔圳，唔洗同人迫．

壞處(2)：做人做事會比較計較
破解：由得佢去計，返正應該唔會太浪費．作為空姐女，大不了對幾日就要飛，所以即使有微言，咪一飛沖天去．返來時就已經係小別勝新婚啦，咁咪又糖黏豆囉.

壞處(3)：工作頗刻板，幽默感可能欠奉
破解：睇多D周星馳，睇多D八卦週刊以外的文本來擴闊視野，令平平的生活中多一點內容，幽默感就會慢慢建立起來．咁同多維方向接觸資訊的空姐女來比較，將不會有太大距離．

Dream Couple (上)

2006-10-06T01:38:00.000+08:00

某日同老友數位傾起偈，點先算係Dream Couple．
結果係點，按下不表．

吾認為銀行男＋空姐女應該係Dream Couple的一個不錯的Formula.

謬論上半場如下
(註:無工作能力或咬住金銀匙出世的富貴人不適用)

人之所以工作，無非係為咗"衣","食","住","行"．
祗要有收入，衣食都可以攪定．

現今香港，住屋方面一定貴到飛起．
如果男的打銀行工，相信按揭利息一定會低一點．
咁就攪掂"住"嘅問題．

女的當空姐，除咗單方面滿足到男方的Fantasy以外，果D平到得原價10%的飛機票，簡直令家人振奮．成個Family都用得．咁"行"都攪掂埋．

無錯，有利一定有敝．下則再寫．

老友出走了續集

2006-10-05T00:06:00.000+08:00

今日又有老友出走了．

部戲拍足七年，今日正式上畫．

可能以係因為老板媽媽生好肯投支，第三集就會響一個月後上畫．

接連第四集亦預告週末前進入後期工作．

第三同第四集均以三個多月來拍... 雖然時間短但質素仍可保持．

唔知我呢部拍六年幾，會幾時拍完呢？

第三次

2006-09-28T19:19:00.000+08:00

尋日，係我工作六年多以來第三次想辭工．

辭職信响年半前打過一次，印咗出唻，飲咗罐可口可樂，冇遞到．
五個月前，我再修改咗一次，比我前任老細勸咗好一輪，都冇遞到．
尋日，我冇再修改過封辭職信，亦都冇印出唻．

對唔住，我唔再咁有勇氣，因為要結婚，因為要供樓．
我甚至連搵工同見工都有毫無勇氣．

工作六年多，我估唔到以前澎湃的勇氣，現在變得蕩然無存．
身邊人話我知，我辭工一樣可以攪得掂．
但係我點都唔可能攤大手板攞洗用．我點過到自己呀！

勁咀喪！

老友出走了

2006-09-16T10:52:00.000+08:00

老友的工作一向高危，每天就如踏鋼線一樣，梢一差池就會從高處墮下，粉身碎骨．

週三得聞老友另有出路，甚覺高興．出走離開公司是老友過去這九個多月的心願，多次過關斬將，換得多之出走無望，替老友不值之餘，多少也領受到其無望的心情．

尋日是老友高危生活最後一天，隨著一件微溫嘅蛋撻，老友出走了．

今日打開老友個部落，雖然冇變又冇新嘢，但係總覺得連老友個部落都開心晒．

我大個仔呀嘛～！

2006-09-13T22:01:00.000+08:00

我大個仔呀嘛，咁咪要學人結婚囉！
我大個仔呀嘛，咁咪要學人買樓囉！
我大個仔呀嘛，咁咪要學人做按揭囉！
我大個仔呀嘛，咁咪要學人咩囉！

原來大個仔都要去學人哋，咁幾時我會比人學番呢？

八二九．買咗樓

2006-09-13T21:52:00.000+08:00

一嘗當業主的滋味，得來了兩天的痴呆．
以為一擇十幾萬會覺得好豪好鴻，結果驚咗一晚．
到底置業都係一件開心事，至少身邊人係咁諗．
但係我真係花咗兩日先至調節到心情去擁抱果份開心．

Yeah... 我做咗業主嘞!

逃離德國．跳出６３

2006-07-11T23:10:00.000+08:00

世界盃踢咗一個月，我部有線解碼器就一直停留响63世界盃台，一直都無轉過台．

今天，終日衝眼瞓，黑眼圈的生活終於可以緩和一點．

失望的是阿叔舊日講波的功架已經盪然無存．

港生．女權

2006-07-11T21:58:00.000+08:00

港姐選舉，口號為美貌與智慧並重．目的除咗選靚人之外，仲要代表香港出外比賽做乜乜親善大使．

港生選舉，口號為創造男人新主義．個人認為係為咗平衡現今香港地女多男少的人口而攪的節目之外，目的在於落實現今香港女性對香港男性的外在要求．

從報名參加港生選舉團到港生泳裝環節，無不顯出香港女性的醜態，果種尖叫果種喉擒，簡直誹爾所思．台上果班港生直頭似隻鴨(舞男)，又拮腳又Fing手指，唔知有無禽流感呢？

多多少少都有Ｄ鄧森美同小儀唔抵，大鑼大鼓選鴨就得，响空氣中吹吓水就要停薪留職．

哎女權！真係World Peace 呀！

你有型．我有型

2006-07-04T16:52:00.000+08:00

老友的部落中得到一個連結...用完廿七條問題之後得出以下結果.又幾準喎！

------
付出型（和藹慷慨，富同情心）

您是外向、快樂、活力充沛、友善、自信、討人歡心，尤其是樂於助人。
您自願為他人提供時間、精力及物質，而且您所贈送的禮物總是經過精心挑選。
您的世界是以人際關係為主，面對別人的需要和感覺有天生的同理心，能調整自己以迎合他人的需要。甚至更徹底地成為別人想要認識的那種人。
您會因應不同的人而有不同的表玩，卻不帶任何欺騙成分。

優點：
您會給他人無條件的愛，讓人覺得溫暖。對別人和善，並且經常給別人鼓勵。

缺點：
當人們對您的不斷付出不以為意，或是視而不見時，您會表達出強度足以震驚他人的情緒或憤怒。

愛情：
專注於一對一的關係，一旦選定和某個人交往，會以精心設計又而深具誘惑的手段攻擊目標，直至「追到手」為止。

您對自己能讓人人都想和您成為情人的能力感到洋洋得意。
「我能讓每個男人感覺自己就像個國王，即使只是共處一夜。我能讓他因為我拿酒杯的特定方式，就永遠都忘不了我。若這是一段較為長期的關係，我會深入調查他所喜歡的一切，驅使這個人上癮。」

安定方位：自我型
在安定的狀態下您會增強情緒的一面，有從親密關係中抽身而出的傾向。

壓力方位：挑戰型
當面對感情的壓力或情緒對抗時，您會變得專制、易怒，最後勃然大怒。
不願遭受控制的慾望會擴大至對自由的渴望，為了維護自己的立場，以平常不曾表現過的方式去抗拒他人的要求。

建意：
注意個人的成就及價值
告訴別人您的需要，並讓他們為您而做
注意「多重人格」的衝突

最渴望：被愛，被別人需要
最恐懼：孤獨，不被喜愛
最難達到的美德：謙卑 (Humility)
最難克服的執念：奉承 (Flattery)
------

老友，不防一試．條連結就在下面，自己來！

<你有型>

誰能明白我

2006-07-03T16:46:00.000+08:00

"昂然踏著前路去，追趕理想旅途上，前行步步懷自信，風吹雨打不退讓..."

林子祥這首作品曾經盛極一時，一股自我一股併勁直上心頭；今天聽來我卻感到無限蒼涼．

農曆年身邊人同我講，我嘅脾氣變差咗，示意我多加留神，嘗試將工作和生活分開一Ｄ．可惜四個月後嘅今日，我變本加厲，每每將芝麻小事化成天一般大．

身體一天比一天疲備，精神一天比一天散亂．
老友唔明白我想點，身邊人唔明白我嘅見解我嘅意思，正如我唔明白佢哋一樣！
討論問題變成問題多多，甚至變成吵咀嘅原因，到頭來問題變得更複雜，
發現自己開始越來越唔識去表達自己．有時甚至完全唔想講嘢！
我係咪已經達到嘅抑鬱地步，係唔係應該去睇下心理科醫生或者精神科醫生呢？

當我自己都唔係太明白自己嘅時候，醫生會唔會明白我呢？

我係咪傻咗呢？我係咪癲咗呢？

我好辛苦呀！

黃昏的酒氣

2006-04-17T00:38:00.000+08:00

上星期二黃昏，第一次同公司班兄弟一齊去飲酒．

志在蛇蛇，志在吹水．

果個配搭算係少有，橫跨三條 Teams 加埋兩個 consultants．

由工作吹到人事，由人事吹到股票，由股票吹到足球，一吹就吹足兩粒鐘．不亦樂乎！

離開滿地花生殼的酒吧，一身酒氣．獨個兒返上 Office 再下一城時，駭然發現效率其高，事倍功半．我開始愛上花生的氣味，愛上黃昏的酒氣．

兄弟，我地擇日再飲．飲杯！

背起十字架的人．背起十字架的心志

2006-04-16T01:47:00.000+08:00

星期五晚，受苦節崇拜中，聽了一個小故事．

"耶穌又對眾人說、若有人要跟從我、就當捨己、天天背起他的十字架來、跟從我．" ～路加福音九章23節

有一群人背著他們各自的十字架跟從神．走了一段路，其中一個覺得十字架重了，於是他求神讓他鋸走十字架的部份，好讓他可以走得輕省一點，舒服一點．結果他鋸走了十字架的部份，繼續上路．

未幾，他又覺得十字架變得沉重，於是他又求神讓他再鋸走十字架的部份，好讓他可以走得輕省一點，舒服一點．結果他又鋸走了十字架的部份，繼續上路．

如事者，那人一次又一次的鋸走了十字架的部份，繼續輕省的上路去．不久他和其他的人來到一個懸崖，其他的人見狀，便利用自己背著的十字架作橋，攀到懸崖的對岸，可惜那人因為先前多次鋸走了十字架的部份，結果他的十字架短了，再作不了橋，不能跟其他的人一樣往前行．

故事的結局是那人求神再給他一個十字架，結果神答允了且從天降下另一個十字架給他，好樣他能繼續的上路．

思　想：若果我從自己去出發，想背多重就背多重的話，我就不能捨己，跟從不了神．今天我的十字架一點也不覺得輕省，我能背著，因為神讓我仍能背．我想這就是背起十字架跟從神的心志了．

工作不滿測量器 (不是叮噹的法寶)

2006-04-10T11:54:00.000+08:00

Your Job Dissatisfaction Level is 61%

Your job is a total bummer, and probably the worst job you've ever had.
Your co-workers stink. Your boss is a jerk. And your company is probably in trouble.
Think about finding a new job quickly, even if it's just a not-so-great transition job.
You've got to get out of there as quickly as you can!

Should You Quit Your Job?

Times Up

2006-04-10T10:52:00.000+08:00

唔知幾時開始，電話訪問變得白熱化．
早前一接電話，對方就會一輪嘴又哎又西話用三十秒同你做個訪問．
結果往往都要消耗你三至五分鐘先可以收線．

今日我又接一個電話訪問，照例又係一輪哎西話做開場白．
不過佢居然話廿零秒可以攪掂．本住好奇嘅心態，我毅然接受．
但係條件係廿秒後我會收線．聽完條件，對方就急不及待開始發問．
最蠢嘅係，佢居然仲要問選擇題，講完問題又要講ABCD嘅答案．
當然我亦有一一作答，可惜問到第四條已經Times Up．

細個阿媽教落做人要有頭有尾．
所以我同對方講咗一句："夠鐘．拜拜！"然後掛線．

我係賤人，絕不否認．但係我絕對有宗旨兼賴有原則．死未！

人轉人．可惜並不人傳人

2006-04-06T12:10:00.000+08:00

呢份係我一生人至今第一份職業，六年零一個半月，其間已經轉到第三個老細．

第一個老細，佢好有資訊科技的智慧，亦都好肯教嘢同努力做嘢！同佢博雖然辛苦，但係從不後悔．

第二個老細，佢冇乜資訊科技的智慧，但係好肯做好勤力，基本上同隻牛冇乜分別！同佢博真係辛苦，但係冇計，因為一齊辛苦．

第三個老細，佢冇資訊科技的智慧，又唔肯做，淨係識同人吹呢吹路．

人是轉了，可惜要好的元素卻呆在原地絲毫不傳．唉，那有彼益呢？

體諒

2006-04-06T11:19:00.000+08:00

尋晚，我嘗試反省一下自己，究竟我算唔算識得體諒人呢？

如果以一百分做滿分，我又會有幾多分呢？

我想我大概都會有75分啩．

失分在那裡呢？死响自己Ｄ臭脾氣度囉！

其實，無論對同事對朋友甚至對女友，我都好想做到一百分．

但係真係好有壓力．我忍得好辛苦．辛苦到好少開懷咁笑，辛苦到好易會發脾氣．

若果我曾經對你動怒，若果我曾經不禮貌的對你，求你原諒，請你體諒！

老友，我不是全心對你動怒對你不禮貌喎．

我像只海星

2006-03-16T00:07:00.000+08:00

記得非典年頭，暑假檔期的旅行團平得非常．那是我第一次(至今仍是唯一一次)去泰國．

當地導遊阿黃在清清的水中撿起一隻海星，原本海中軟綿綿的海星一旦離開水，立刻變得剛硬起來，目的祗為保護自己．

今天晚上，跟上週四才回家休養的嫲嫲聊天起來，說題說到我的臭脾氣來．

心想...大概是父親的遺傳吧！哈哈

其實...面對著一些自己緊張的事情，梢有差遲我不難會發脾氣．當家人受委屈或受他人傷害，卻又忍氣吞聲時我會發脾氣．目的跟海星離開水面時的反應是一樣的，為的是保護自己半徑一米內的幸福．

如果白雪公主或者藍精靈要拍真人片的話，我相信我我可以把"生氣Grumpy"或者"勞騷王"的角色演得活靈活現．

天堂與地獄的分別

2006-03-15T11:53:00.000+08:00

好耐之前聽過一個有關天堂同地獄的小故事，昨天晚上又令我諗番起．

故事描述天堂同地獄都有一個共通的地方，就是當進餐的時候，所有食客都會分別坐在一張巨形的長餐桌的兩旁，手拿著一雙極長的筷子，面前放著一碗熱烘烘的食物，二人相距甚遠．

地獄裡頭的食客：面對食物卻吃不到，個個骨瘦如柴，面無笑容．因為他們用盡方法都不能用長長的筷子夾起面前的食物進食．

天堂裡頭的食客：全都吃得飽飽的，個個面露笑容．因為他們用長長的筷子夾起餐桌另外一端那食客面前的食物，放進那食客的口中．

自私讓人失去理性失去親情．而我卻在現實的生活中，親人的圏子裡發現故事那地獄的特質．

如果天堂與地獄祗相差一線的話，我想最辛苦的會是站那分界線上的食客．更辛苦的是那食客既不是一個聾子，也不是一個瞎子．

成功?!

2006-03-08T10:29:00.000+08:00

不論用邊個角度去睇，佢都冇辦法令到我可以將佢同成功拉上任何關係．

我心嗡了．我哭了

2006-02-26T01:10:00.000+08:00

自九九年十二月起至去年十二月(六個年頭裡)，我經歷了三個疼錫我的長者離世，自己在三個過程中也沒有流過半點眼淚．因為在三人生前我可以做的事，我都做過了．

昨天晚上是嫲嫲入院的第十個晚上，今天她仍然安好，正用她抵抗力稍弱的身軀去跟"生蛇"的病毒在神經線上打仗．每天我也到醫院探望她，跟她按摩，跟她的腳作運動，替她刷假牙，加熱水，凡可作的我都作．

我活了三十一個年頭，跟嫲嫲的接觸每年大底祗有三兩次，分別是團年，大年初一和她的生日．作為她內外孫中最細的阿十，老實說，我也未嘗為過我的嫲嫲批個一個橙，蓋個一張被，甚至燒過一鍋水．作孫的，我不孝．

週五晚上病房的護士告訴我，嫲嫲的身體有望可以再轉好一點，下一步可能就是回家休養的善後安排，她建議家人們可先行討論回家的善後安排．對一個九十二歲的老人家，十天不曾下床走走，極可能在短時間的日子不能行動自如，需要有人旁照顧．怎算？方案有二，請傭人或是入老人院，對方案的實踐祗需要－錢！

五個當子女的，兩個因為全無收入加上身體也常冇病痛，所以不能參予金錢或行動上的支援，一個說祗可以每月掏出三兩佰元，比較富裕的兩位卻說祗有三兩佰元，所相差的費用他倆擔當不來．我心急如焚，他們居然你推我讓，說出歷史裡兄弟姊妹間的恩恩怨怨得來的新仇舊恨．數著芝麻綠豆，計著雞毛蒜皮，說著離天萬丈．

可隣嫲嫲獨自在病床上為病奮鬥．倘若她聽到子女們的推搪，我想她會失去鬥志，我想她會離開．聽著所謂"長輩"們的種種籍口，我心嗡了，我哭了！這是星期五晚發生的事．

和諧小隊

2006-02-26T00:31:00.000+08:00

部門內部人力資源的調配在去年七月發生，離開跟隨了五年半的上司．心有不捨的同時心亦擔心，不竟要跟另外兩位別隊的成員作較多方面和衡常的接觸．

當今年年初遷入2304之後，好像被孤立的本部門開始明白如果還要槍口對內，大家前頭的日子將會極之難過．不單小隊中的人，就連他隊的部人都開始收起大家的防護罩．

之前自己對小隊的擔憂是白白的．反而小隊的同事間多了一份少有的和諧．原來大家多做一點是可以溶解人和人之間的冰牆．一盒食物一個分享，讓彼此都能了解大家多一點．

以前我實在不會為公司內的同事擔心任何公事以外的小事，今天我為兄弟和他們家人的身體健康擔心；為兄弟們的工作量擔心．倘若我幫得了，我願幫！目的祗有一個，就是跟這和諧小隊的成員一起享受收工時坐升降機往下走那十多秒鬆馳的空間．

好希望有一天，和諧小隊一干人等能一起放工，一起在公司樓下的酒吧喝完酒才各自歸家．

我好希望！

半徑一米內的幸福

2006-02-22T11:01:00.000+08:00

最近正在看一部分上下集的日本漫畫,"FLY DADDY FLY"！
一位父親為了想懲罰打傷他寶貝女兒至重傷的高中生，決心去持刀報復．但年長的他加上膽怯的心，令報復的事在未到達那高校前已告失敗．漸漸地，他發覺原來自己一直為生活和為家庭家人的努力，祗是維護著那"半徑一米內的幸福"．看到這句話，我停了下來．

思想著發生在自己半徑內的事情，算幸福嗎？
究竟我這半徑有多少，能達多遠？一米，兩米或是很多很多米．
每天返工的努力能給我帶來多少的幸福？

縱然未有答案，但我想我仍是會併命的橫衝直撞去為我這個半徑的領土找幸福．

漫畫仍未看完，我必定會把它看完！

老友，不知你的半徑內是否一樣的精彩，一樣的跟我血流彼面，或是已經貼上有卡通面的膠布．

但不論如何，你我的半徑範圍內已有重疊的部份，就讓我們在這重疊的空間內一同的流血流淚流汗微笑大笑傻笑．

好幫人的肥傢伙 (連有答案的問答遊戲)

2006-02-21T16:27:00.000+08:00

從前有個肥傢伙，佢好幫人．受幫助的人全都比肥傢伙高級一點，人工也比他高級一點．那比肥傢伙高級的人有甚麼做呢？你估吓！

答案係：比肥傢伙高級的人外遊去了．

究竟在外遊的高級人有乜要肥傢伙做呢？你又估吓！

答案係...
我都唔知．

我唔知，包括以下三點～
壹：唔知高級人會比乜肥傢伙做
貳：唔知高級人究竟有無比嘢肥傢伙做
叁：唔知肥傢伙識做乜(除咗訂蒸餾水之外)

身為肥傢伙下的低級人員除咗要做自己嘢以外，仲要頂埋肥傢伙因為好幫人而垃埋唻做嘅嘢！咁肥傢伙仲有咩做呢？你再估吓！

答案係："內游"
即是响公司裡頭*游來游去．

*-見此符號，可以用普通話去唸往後的詞語，將加倍有快感

奴隸獸之我是幸福的男人

2006-02-17T18:23:00.000+08:00

情人節不乏見到情侶一雙一對的出現在繁華鬧市．大部份的情侶也有一束花在他倆中間．令我覺得比較特別的是抱著花的大都是男孩子，正在他左擁花束的同時，右手則是牢牢的挽著女孩子的手"袋"，急急的緊隨女孩子的腳蹤．外表看來很像奴隸獸．

我幸福皆因女友從不要我為她挽手袋行街街．對不起，我不是在取笑為女孩子犠牲尊嚴的男孩子們，也不是在炫耀自己的幸福．

我祗想問：硬要男友為自己挽手袋的女孩子，可有在買手袋的同時，考慮一下該款手袋是否能跟男友合襯？因為挽手袋的會是他不是她！

最大鑊的是不知可時開始，女孩子手袋的體積變得越來越大，大得有點像環保購物袋，不單祗可以同時放平常等洗同唔等洗嘅嘢，仲可以放埋生菓，米，甚至係一條狗都得！

要知道到頭來挽手袋的人不一定是女孩子本人，咁重親邊個都唔好啦！唔通愛一個人要睇佢有幾捱得，可以受得多少重量的手袋咩！你估考"咕喱"呀？

肯為女友挽手袋的男孩子，我尊敬你，但係小心重呀！

精英補習人．學做古惑仔

2006-02-07T11:04:00.000+08:00

尤記得中學會考年代已經極之流行補習社，大部份出名嘅補習社都以某某名師為號召．當年嘅名師雖然土土地，但係真係幾有料．至少我連一科都無肥佬啦！

時至今時今日，補習社居然變成地鐵廣告牌同巴士車身廣告，所謂嘅名師就染晒頭長晒毛咁．心裡面諗，如果我有個仔比佢哋補完，唔知會唔會响社團裡頭坐到一個比較穩陣嘅位呢？幾時可以上位做得成揸Fit人．如果會考中英數都Cre到，可唔可以九個場睇吓呢？

現今補習社名師＝高等教育古惑仔

係，我以貌取人．但係冇計，唔通要我用成個學年去驗証金毛補習名師嘅真與偽咩！唔洗錢呀！

初五拜年仲未遲

2006-02-02T10:52:00.000+08:00

祝老友們
新年快樂，身體健康，
食極唔肥，人見人愛，
衰運走晒，減時加薪，
留學升班，狗年大旺！

保安的溝通技巧和要求

2006-01-24T19:36:00.000+08:00

保安溝通的技巧和要求如下，務請熟讀，並靈活運用之．
- 喂喂喂
- 唔係，其實就咁樣...
- 喂大佬呀！
- ＸＸ，開會嘞！
- 唔得喎，我要去開會喎！
- 我唔理呀，你哋砌唔掂我開會就攞唔到出唻講嫁啦！
- 我好忙嫁，仲要幫你哋訂埋水．
- 其實最好嘅做法就係...
- 我點識點做唧．
- User 填咗 Form 未呀？
- ＸＸ，唻唻唻...
- 咁唔得喎！
- 你叫我點解釋比ＸＸ聽唧．
- Ｘ太話要咁做...
- 你明唔明呀？

註："X"是別人的洋名或其丈夫的姓氏

十四個汗臭男的晚上(打籃球)

2006-01-22T01:09:00.000+08:00

一到週五夜晚　二隊各佔半場
三分外圍起手　四個後備球員
五人緊守崗位　六犯無需離場
七人輪流替換　八個防守籃板
九次傳球助攻　十分落力爭競
十一點正完場　十二分鐘更衣
十三大碟宵夜　十四個汗臭男

多謝球場上的老友陪我一起流汗一起吹水！

老友送來的祝福

2006-01-18T09:46:00.000+08:00

老友兩日前送來兩只揮春．任我二擇其一．"財源廣進"同"出入平安"中，我選擇後者．仲即時貼响辦公桌的當眼位．

老實講，兩種祝福我都想．但係"平安"係响財源廣進後都買唔到嘅嘢，所以都係平安可靠Ｄ．

好感謝老友送來的祝福，滿有熱力之餘，亦令工作帶來的壓力有點緩和．

老友們，祝願你地狗年個個都－平安，身體健康，財源廣進，煩惱少歡樂多！

Terminator 的笑話

2006-01-16T16:50:00.000+08:00

曾經飾演Terminator嘅美國現任加州州長亞諾舒華辛力加電單車撞車意外．後來亞諾被揭發原來係無電單車牌．

好笑嘅地方係...
Terminator無牌駕駛差ＤTerminate咗自己同個仔．

可能好無聊，但係我覺得好好笑！

呢一刻五個最想去的地方

2006-01-16T10:25:00.000+08:00

回應Dino嘅邀請，有以下五個我最想去的地方

希臘愛琴海
藍天白屋，係夢寐以求嘅渡蜜月地方．

法國巴黎聖母院
鍾意程度達至死硬派．連自己都唔明點解．

澳洲大堡礁
水中靜靜的環境，魚群在身邊游．但必須先學潛水．

美國芝加哥
全因籃球而喜歡這個城市，有些少聖城嘅感覺！

台灣台北市
食食食飲飲飲特別多，忙碌跟攸閑分得好明顯的地方．

之所以想去，基本上都係因為唔想返工～！

未諗到請邊個駁腳，稍後更新～！

"I AM NOT ALWAYS RIGHT...

2006-01-11T19:46:00.000+08:00

BUT I AM NEVER WRONG!", Garfield said.

厭惡返工渴望放假症 (fm CYJOYCE)

2006-01-05T10:55:00.000+08:00

我都有呢個病症．

老友，知唔知邊恕有得醫呀？

新公司新制度...仲衰

2006-01-05T10:11:00.000+08:00

己經返咗兩日新Office，感覺係仲衰咗．今日係第三日．

Day 1：半層Office成六十人，全日得一筒蒸餾水，
　　　　　冇熱水，唔夠三點已經一滴都冇．
　　　　電腦上唔到內聯網，到上到嘞就已經係五點半有多．
　　　　上厠所要用匙，23條佬共用一條匙．
　　　　配士啤匙要自己攪自己比，一條最平都要15蚊．
　　　　大門冇得鎖，因為電子鎖仲未裝好．
　　　　冇阿姐洗杯，冇厠紙供應．

Day 2：仲係冇水，全日都冇．
　　　　大門仍然冇得鎖，電子鎖依然未裝好．
　　　　肥實Ｑ開始行必，明明掘頭路都仲要死入唻行個圏，
　　　　　真敬業！
　　　　
Day 3：同第層樓乞到一筒蒸餾水，睇吓頂得幾耐？
　　　　一位老友同事放完假歸隊，見到佢返唻開心到眼有淚光！

食．玩．瞓

2006-01-02T23:44:00.000+08:00

瞓玩食玩食玩瞓.... 冇食早餐!
這是０６年的第二天．

仍然係"飽"！

聽日要返工，寫埋Blog即瞓．

０６年的第一天

2006-01-02T13:07:00.000+08:00

０６年的第一天...
六個人食咗十八碟點心做Blunch．
六個人食咗十三道小菜做Dinner．
０６年的第一天在深圳渡過，可以用兩個字去形容－"好飽"！

老友們，祝您哋都有飽飽滿滿的０６年．新年快樂！
食飽的感覺真爽乎！

剪咗個頭返新Office，一切都將會重新開始！

年終結算．吐佢口水

2005-12-31T01:51:00.000+08:00

每年年尾，各大電台電視台都會攪好多頒獎典禮去表揚歌手們和幕後音欒人在過一年的努力．

埋到公司年尾，相信都係時後去總結一下公司內部十位值得我哋吐佢口水嘅同事．當然今年內離咗職嘅都計啦！

以下係候遻名單：
Ｂ仔
太平媽媽生
肥實Ｑ
瘦實Ｑ
玻璃Ｏｏｏｏｏｏｏｉ
基斯洞（洞即Hole，同HO同音）
神武哥
周史單利
膠邊豪
珍地
愛德華直頭理

大家可以各自提名自己心目中的十大，我哋一齊吐佢口水．祝佢哋０６年ＰＫ到０７．
請踴躍支持！

有個傻仔(2X)

2005-12-24T12:34:00.000+08:00

尋日部門攪內部聖誕大抽奬，全部實體禮物都係由部內最高級嘅太平部長奉獻出唻．總共廿二份．

實體禮物有水晶，藍芽耳筒，酒，餅，糖等等！我個人相信全部都係Vendor送唻嘅禮物．鑑於唔太吸引，小弟建議太平部長加設現金奬．諗唔到太平部長話如果高級經理每人奠兩舊水抽奬，咁佢就私人攞五舊出唻．眾兄弟姊妹登時為之雀躍，結果多咗兩份一舊，三份兩舊，一份五舊嘅現金奬．呢個時候有個傻仔經過，佢係左右門神嘅瘦門神．

佢對我其實冇乜點，但係話到尾佳節流流，點都冇理由放呢Ｄ高層一馬．我同佢講高級經理都放低兩舊水抽奬啦，作為副部長嘅你點都冇可能少過三舊水掛！點知，佢二話不說就放低咗一張大牛．後來先知佢誤會咗呢個係公司全體聖誕大抽奬嘅禮物．Sorry, No Refund!

比較無孤嘅係另一個傻仔，佢自己去咗放假，但係就無啦啦唔見咗一隻大牛，連自己都唔知，仲要Ai都冇得Ai．

正所謂怨有頭債有主，呢單嘢要搵人渣頸，體怕要去數碼港至得嘞！瘦門神，小心呀！

冬　至

2005-12-22T20:17:00.000+08:00

冬至都冇得早放．
呢間公司黐線嫁！

蛋撻看人緣

2005-12-21T10:16:00.000+08:00

曾志偉先生曾經講過："祗要你個人唔係咁衰，都總會有人幫你嘅！"

佢意思係話如果你人緣好，當你有所要求時都一定有人幫你手！其實响公司嘅環境入面，要測試吓自己人緣好唔好，係有好幾個方法嘅．其中一個係响閣吓離職當日請班同事食吓"散水Tea"．

請散水Tea係有兩種方法
方法１：掉一張附近荼餐廳或者生菓舖嘅菜單，等同事們自己點．
　　　　-就佢哋點幾多錢嘅食物，你就可以知都你嘅人緣幾好．
　　　　價錢越低，人緣越好．

不過因為上列方法軒攝以本試人，所以用者必須有信心或者有錢．

方法２：自掏腰包買餅或撻請同事食．
　　　　-而餅或撻銷量就係你嘅人緣指標，越快無剩者為之越好．

話說尋日有位"女巡警"離職，佢選擇用方法２買蛋撻同沙翁唻測試人緣．今朝結果公佈，如圖！

口　罩

2005-12-20T16:35:00.000+08:00

由變成非典蒙面俠年份開始，香港人對於口罩同洗手已經有基本上嘅概念同認識．尤其係洗手，經董太多番強調之後，我決定不再多題．

講番口罩，佢嘅用途已經變得多元化到你可能重來未諗過(請多加想像)．

今日我就响太古城嘅一間食肆度見到拉拉麵果位師父用個口罩兜住個下巴．
我相信佢係用個口罩唻遮住佢個雙雙下巴．(對我哋將要將食嘅食物根本起唔到保持衛生嘅作用！)

以上祗係一個例子，如果你能夠想到多一點另類嘅用途，請發揮創意，多留意見！謝！

私有化．唔到 [修正篇]

2005-12-19T22:23:00.000+08:00

地位小小得保存，執翻身彩命依然．大命！
人哋堂堂大企業，為乜買我小公司．難明！
老友紛紛來道賀，皆因公司私有化．唔到！
內裡空空殼一個，點都唔值咁多錢．死蠢！

WTO的啟示

2005-12-19T04:41:00.000+08:00

世貿搞咗六大日，週六算係最核突，
追打警員拆鐵馬，四處亂走發洩吓，
胡椒煙幕鎮壓下，保鮮掩眼我唔怕，
趕入圍住告士打，十多粒鐘嘆返下，
起舞起爐烹麵食，難為警察硬炯炯，
你企我瞓等上車，全區停頓咪話驚，
食飽又瞓法院櫈，呢鋪來港賺到暈，
控動抗議上電視，一週旅程終於此．

WTO對遊行的啟示：
遊行記得帶埋佢，牛扒雞翼保鮮紙，
要調味，衝警察；烹麵食，火同碳，
泳衭泳鏡無話要，跳海游泳唔緊要，
拆鐵快，紮嘢快；拮住燒，食住啀．

仲堅

2005-12-19T03:39:00.000+08:00

老友Louis介紹平井堅隻精選碟過我聽．一向唔常聽日本歌嘅我覺得勁好聽．

老友果然好介紹，平井堅隻碟果然堅，Louis仲堅！多謝Louis!!!

如果...

2005-12-16T11:09:00.000+08:00

如果我部高層要講嘢，你又咁橋在場...
請你掩鼻!

可樂的鼓勵

2005-12-15T13:28:00.000+08:00

有，我曾經真係有諗過，甚至做過"減肥"．一心諗住以后都要同健怡系列嘅汽水為伴．但係...

同老友去食Pizza，得到健怡汽水嘅鼓勵．

鼓勵的內容如下記錄，分為三個方向：
(1)你咁肥，健怡汽水都幫你唔到嫁嘞！然後罐角冒汗．
(2)剩番少少咋，你唔夠嫁嘞，唔好飲我啦！然後罐角冒汗．
(3)先先罐角冒汗．然後話：都出晒汗囉！仲有乜嘢味唧！

一經鼓勵後，我都係決定以後飲番Classic．

圖為罐角冒汗照

在我眼中的公司

2005-12-15T12:58:00.000+08:00

第一年：未有我份，未有得寫．
第二年：依然欠我，仍然空白．
第三年：幹勁年青，實有作為．
第四年：控支忍耐，曙光必來．
第五年：水向上流，癲物倒理．
第六年：人材盡裁，肥雞待候．
第七年：太平未見，方圓擋路．
第八年：了無新意，一塌糊塗．

第九年期望：講故說學，隔岸觀火．

黑澤明的枱

2005-12-15T11:48:00.000+08:00

黑澤明係邊個，唔知！咁呢段Blog你可以Skip嘞！

圖中係肥版黑澤明張枱．

”乱”！

內人眼中的公司

2005-12-14T15:37:00.000+08:00

第一年：亂中起頭，樂在苦中．
第二年：廣告好勁，引以為榮．
第三年：年青幹勁，全為蟹民．
第四年：控支年份，大眾同心．
第五年：肥上瘦下，怨聲連連．
第六年：交名裁員，谷底過渡．
第七年：無能當道，洗錢更狼．
第八年：收歸"盈"有，自欺欺人．

完結篇：在我眼中的公司

補鞋叔叔，好勁呀！

2005-12-14T11:53:00.000+08:00

人窮鞋破要修補...

我有兩對鞋，著咗好一段日子．因為唔係成日著，所以依然好新淨．可能因為唔係成日用隻腳去餵果佢地，佢地肚餓到同時呀大個口．呢單已經係年中嘅事．

星期日，的起心肝帶四隻肚餓嘢去搵補鞋叔叔．補鞋叔叔不愧係補鞋叔叔，佢面對四隻肚餓嘅鞋，居然面無懼色．我叫佢唔洗趕住整好Ｄ鞋比我，佢居然話星期二有得攞，仲連隨講出呢次手術嘅過程，差Ｄ仲做埋風險評估．自問對膠水嘅認識仲算可以，針線呢吓嘢就認真麻麻．莫講話要用針線，連我塞隻肥大手入去隻峽窄嘅鞋入面活動都有Ｄ困難．

尋日去攞鞋，四隻肚餓嘢居然真係俾補鞋叔叔下令全部SHUT-UP．全個世界安靜晒！今日我已經餵緊佢哋期中兩隻．

補鞋叔叔，你好勁呀！

外人眼中的敝公司

2005-12-13T21:21:00.000+08:00

第一年：靚仔獨立，一鳴驚人．
第二年：品牌出眾，形象清新．
第三年：創業上市，股價下滑．
第四年：廣告嚇人，投訴到暈．
第五年：新牌落實，起死回生．
第六年：客量上調，雷聲漸大．
第七年：下雨頻頻，聲音小小．
第八年：易名收購，前景光明．

續集：內人眼中的公司．

數人頭

2005-12-10T11:11:00.000+08:00

"一，二，三，四...三十二，三十三，三十四．今日全公司總共有三十四個人返工．"

以上是本公司資訊科技部副部長(瘦實Ｑ)响今天早上巡邏十三樓全層之後嘅結果．

其實我哋仲有半層十六樓嘅辦公室．吓！唔知佢有冇將大數減一扣返自己出唻呢？

11:39 a.m.更新：資訊科技部副部長(瘦實Ｑ)經已鎖門走佬了．怕且要去遊行掛！

ＢＢ財務

2005-12-09T12:04:00.000+08:00

呢輪响地鐵站入面經常見到一個ＢＢ廣告，個ＢＢ真係好鬼得意，大眼碌碌咁．自問都係一個ＢＢ發燒友，通常我抱ＢＢ果時，佢哋都會好俾面唔喊．唔好誤會，我絕對唔係戀童癖．

話說回頭，我起初以為個ＢＢ廣告係賣奶粉，又或者係Ｄ育兒基金之類嘅嘢．但係誰不知原來係財務借貸．ＢＢ同財務借貸究竟有乜關係呢？生仔要用錢，我知．要用唔少錢，我都知．但係如果生仔要借錢先生得，我令願選擇用Dom Dom．

其實個廣告係想話咁"簡單"嘅財務借貸連ＢＢ都明．Sorry，我唔明點解ＢＢ會明！根據我實戰所得，ＢＢ通常會明你同佢講嘢(講乜佢未必知，莫講話明)，餵佢食嘢(好就食，唔要就吐)，而佢大多數俾到你嘅反應就係"笑"同"喊"．就連成年人嘅我哋都未必明白個ＢＢ想點，為乜喊？我哋又點可能令ＢＢ明白我呢Ｄ所謂嘅財務借貸呢？佢哋邊庶有錢呢個Concept唧？

簡單唻講，如果你可以好似ＢＢ咁單純(嚴勵Ｄ就係白痴)，你先至有資格去搵呢間公司做財務借貸．

(設計對白)財務公司說：ＢＢ，有舊錢等住你借呀！埋唻啦，ＢＢ！
背後的真言：白痴仔，有舊錢等住你借呀！埋唻俾我放血啦，白痴仔！

不合理的採購

2005-12-08T12:05:00.000+08:00

公司每年都會對服務咗五年嘅同事表示心意．

由2002年開始，每個服務咗五年嘅同事都會收到一支萬寶龍(Mont Blanc)筆．

過住數年送出的萬寶龍筆，市面價都要$12XX一支，唔係最貴都一定唔係最Cheap果支．事關每年訂購數量都成八十支或以上，由於量多，通常都可以响Agent度攞到折扣，仲有埋自己個大名刻埋上去．據調查所得，去年就起碼有七折．

今年由幾位市場部女同事去主理萬寶龍筆採購事宜．透過Agent去訂九十一支萬寶龍筆，支筆不單祗係同廠最Cheap市價$660果支，冇刻名，仲要係冇折扣．筆竿同一支市價$4嘅STABILO Liner 808黑色筆去比較，遠睇根本冇分．老實講訂咁多數量，我唔太相信會攞唔到折扣囉．再者收到筆後，我想加錢換購過另一支High ClassＤ嘅系列，市場部女同事又話Agent話冇得退冇得換．乜嘢Agent唻嫁．自己友呀？打籠通呀？

雖則話公司紀念品，心意是也，我明．但係如果有自己友從義務工作中掏利，就勢係假！若果今年嘅萬寶龍筆採購可以有七折，一支可以有利潤兩舊水，九十一支就有皮八可以落袋．利潤之高，嚇死唻！

最頂癮嘅係，大秘書居然走唻想話擺平件事．我開始懷疑佢都係幾位市場部女同事嘅自己友．老實講，如果現金五舊同支咁嘅萬寶龍筆俾我撿，一定要五舊水現金．自己食咗佢又得，同同事大吃一餐又得，再唔係攞嚟婚宴做人情又得，得咗！

話時話，真係有老友零五年除夕請飲，好掛住果五舊水．

人肉電郵伺服器

2005-12-07T10:50:00.000+08:00

公司好奇離，怪人特別多，
日間有實Ｑ，肥腫唔緊要，
成日去行必，洗地佢至叻．
平時冇嘢做，吹水兼答爹，
行唻手撥撥，十足招財貓．
開會眼碌碌，全身都唔郁，
有事向下瀉，有鍋你要"咩"，
電郵亂咁寄，功能唔曉用，
永遠冇過濾，人肉做得嚟，
呢個叫做乜，電郵伺服器．
講完！

心　願

2005-12-07T09:10:00.000+08:00

愛人嫲嫲離開了，是今早清晨的事．

沒有見得她最後一面，但臉上留下的安詳，卻令我安心下來．

心願最後的路程不是獨單的在醫院裡過渡，心願可一嚐家中小菜的風味，心願安樂舒服的離開，最後的心願都成了．

留下來的老伴，雖然外剛，實在內傷．按著他的肩膊可感到他內在的翻騰內裡的激動．女兒悲傷，媳婦淌淚，孫女哭泣；為的是一個不捨，一份情結，一杯普洱茶．

心願裡，其實不包括親人太多的悲傷，太多的眼淚．這才是離世人最後最後的心願．

蚊釘記(下)

2005-12-06T10:47:00.000+08:00

尋晚守候咗一輪，都見唔到隻可惡嘅蚊乸．再蛤吓盤肥皂水，半點蚊影都冇．諗唔到蚊釘記下集會係咁嘅結局．等我仲以為會有連場三級血戰！

臨瞓前開始有些少懷疑，懷疑隻可惡蚊乸响啜我Ｄ"Ｏ"型血嘅同時，仲吸埋我皮下嘅天然保暖物料－脂肪．响咁凍嘅天氣底下，脂肪係好易凝固．故此我有理由相信隻蚊乸已經失去咗佢覓食嘅能力，所以尋晚收咗工．

不論點都好，蚊乸搵正我唻開餐，肯定係佢唔好彩．睇吓佢下次仲敢唔敢．唔知佢仲有冇下次呢？

蚊釘記(上)

2005-12-05T12:12:00.000+08:00

係人都知蚊係一種靠吸先可以生存到嘅昆蟲，而我哋寶貝嘅Ａ型，Ｂ型，Ｏ型同ＡＢ型就係蚊乸果碗飯！

你有冇發覺Ｄ可惡嘅蚊係專門釘Ｄ雕轉位，好似菠蘿蓋呀同手指轉彎位咁，釘時唔覺，事後痕到飛起！尋晚我就俾蚊乸強姦咗成四十五分鐘咁耐．結果我爬起身搽咗Ｄ白花油响果Ｄ雕轉位度先再瞓．

臨再上床前記起有個老友講過話，肥皂水可以令Ｄ蚊投水自殺．即刻整返盤放响床左緊，仲加咗一張驅蚊貼．呢次佢仲唔死？可惜今早起床蚊屍都冇條！

咁唯有睇下今晚佢運氣點啦！

喂，你今日俾蚊咬咗未呀？

今時今日

2005-11-28T10:22:00.000+08:00

唔係好記得邊時開始，劉德華開始响電視度出現，提Ｄ服務業人仕，"今時今日咁嘅服務態度..."

唔知係咪因為個廣告嘅宣傳果效，定還是係明星效應．香港服務業人仕嘅服務，果然好起上嚟．最明顯嘅係便利店(可能係因為近期有公仔換，接觸多咗！)一行入去，班店務員就好似梁天來擊鼓嗚怨咁係咁同你講歡迎你嘅說話．如果你呢排自我形像低，不防考慮响便利店冇咁忙果時，隻身入去感受一下，話唔定可以提升到自我形像．但係提升到自我形像並唔代表你會靚仔咗或者靚女咗咁行返出唻！

話說回頭，店務員熱情嘅說話，祗會响講完後頭五秒對你生效．因為五秒一過，店務員就會重複一次果堆熱情嘅說話，一字不漏．聽多一兩次，我會問："你班友講嘢究竟有冇Heart嫁？"不如叫工公司搵專人代你錄隻CD，响舖頭播呀笨！再唔係咪嘴都得！所以我每次入去都會匆匆咁買完嘢就跳返出唻．如果唔係我驚我真係會抵唔住頸鬧佢哋！

唔信，你試吓今時今日去吓７仔，ＯＫ，老行家，Bosinni感受一吓啦，老友！

交　待

2005-11-26T10:19:00.000+08:00

尋日同個同事搭地鐵，話題中講起"交待"．

同邊個交待？交待Ｄ咩嘢？...

老實講，有人交托自己去辦事，响有交帶同盡責嘅環境底下，我覺得要去同委托人交待一下事情嘅狀態同進度．交待係唔需要等人唻問先答．

如果有人問我問題，我可以選擇答或者唔答．呢種叫做問答(我哋自入學以唻都領過唔少嘢)．我選擇作答極其量祗係表達我嘅意見同感受，並唔代表我同佢交待Ｄ咩嘢．同樣地，我選擇唔答，頂多你可以話我知情不報，但係並唔代表我欺騙人．

"交待"同"問答"，祗係一線之差，其中前者比後者唻強烈一點罷了．

我是一只小小小小鴨

2005-11-25T09:50:00.000+08:00

身為資訊科技界嘅一員，好應該有一套專業操手．

在過去五年多專業培"瞓"下，不知不覺間連慰安婦嘅角色都要做埋．我哋嘅"太平"媽媽生同肥瘦保安從來都唔會幫我哋Ｄ男技去擋住果班禽獸用戶，任佢哋亂咁插．老實講，我哋收番唻嘅都係辛苦錢唻嫁！

尋日，我終於知道我响週日公司已經唔再只係擔當慰安婦嘅角色，而家我直頭係"鴨"．
以前嘅日子，我頂多都等班禽獸用戶唻插．而家我要出埋去接笿．自己連晏都冇得食就一只鴨咁死落中環門市面對十條老細，過程被人攪足一百零五分鐘，長過皇馬對巴塞果場波！做完之後，根疲力竭，先至博得一盒叉鴨飯．咬住一啖一啖自己同類嘅肉，感覺有Ｄ辛酸．

我好相信呢個祗係開始．日後有排受！

做鴨嘅生涯，祗有有苦自己知！

有冇咁橋呀？

2005-11-24T11:12:00.000+08:00

如果你係一個人住，唔知你有冇發覺一樣嘢！就係...

當你有一日攤响屋企竭一竭，諗住無人會搵你，咁你就可以打機睇碟又或者可以靜靜咁聽吓歌，有七成以上嘅機會你可以成功實踐．剩低果三成通常係因為你嘅父母親急CALL你出去飲茶又或者你Ｄ豬狗朋友叫你出去四圍貢．呢三成咁橋嘅情況大置會响你一立定決心打機睇碟或者聽歌果時電話就會響．

如果你成功通過呢一關，可以响屋企打機睇碟或者聽歌，我恭喜你！响你進行你想有果隻娛樂嘅同時，請你務必要保持你嘅坐姿同狀態，千萬米上厠所，沖涼，或者煮嘢食，因為電話將會响呢一Ｄ你最行唔開嘅時候*不自覺咁響起唻．然後你心裡就會第一時間咁講"xy@#%*!有冇咁橋呀？"

唔信！下次自己試吓囉，老友！

*最行唔開嘅時候包括：你舒暢緊，成頭泡或成身鹼果陣，又或者係你煮瀉嘢嘅時候等！

AP小人物

2005-11-22T10:42:00.000+08:00

在下不才，徒勞五載，
卧在週日，青春不再，
五年人事，歷度翻新，
領導無方，肥瘦遊閑，
言而無信，全無責任，
活在階下，苦像地獄，
所言"專業"，實謂"吹水"，
又要實幹，又要門面，
要求多多，實踐少少，
人才漸走，滿目荒涼，
每日返工，行屍蕩蕩，
問我是誰？ＡＰ一個，
小小人物，舉足鴻毛，
值此平台，一呼怨氣，
謝謝觀看，謝謝留言．

太平紳士的工作

2005-11-18T15:50:00.000+08:00

太平紳士的主要職能是巡視監獄、羈留中心及其他院所，以確保其有效管理及沒有任何人士被不公平對待或被剝削權利。

從來冇認真去思想過太平紳士職能有乜特別，為咩香港戰後到而家呢個咁和平嘅年代仲要委任新嘅太平紳士．今日我終於諗通咗！要太平紳士仍然有得撈，監獄、羈留中心及其他院所必須仍然有生意．要以上院所繼續繁榮，香港呢塊豆潤地就必須要繼續混亂，要幾亂就幾亂．基於不久之前提及循環嘅道理之下，造成混亂嘅就係"太平紳士"．

因為諗通咗呢點，我終於明白敝部門之所以咁混亂，咁Ｑ多人走，完全係因為有身為太平紳士嘅領導响度搞搞震．可惜佢仲未明白人口下降都可以令到佢冇得撈，皆因一切院所將會空空如也．

太平紳士呀！可能你個女住緊果庶先至係你覆行職能嘅最好地方．去搞你個女啦！

酒肉小組

2005-11-17T13:09:00.000+08:00

"酒肉小組"係由一堆傾得埋又鍾意食嘢嘅公司友組成，呢堆友係由公司不同部門度跑出來嘅．呢個組合嘅宗旨，完完全全祗係為咗"不談工事．祗談心事．為食嘻哈．為玩嘻哈"．

So Far 個效果都幾好，最好嘅地方係有一個私人地帶可以比呢八九條友放聲大笑，放聲尖叫，將悲奮同愁悶化作胃口．仲要有其他人一齊陪你食，冇得減肥．

奉勸各位組員，千萬勿上磅！

準時收工

2005-11-16T18:55:00.000+08:00

七點有多啦！唉，响私人公司工作就係咁．永遠都冇話準時收工．

咩嘢朝九晚六，一星期工作四十小時．我成日都覺得呢Ｄ係握人嘅技倆．主要係氹閣下簽以身相許狀．祗要你一簽名，條件就立刻變為"六朝晚工作．一星期九十四小時"．

所以話呢！祗要"最高工時最低工資"法例一通過，整條法例就會被祖國釋法人仕解釋為"工時最高工資最低"，原因係立法時用英文，完全受到倒裝文法的影響．

唉！打工仔，唔好望可以準時收工．做嘢啦，仲睇！

循　環

2005-11-11T10:46:00.000+08:00

果然係不"日"記，已經冇寫四日．

愛人嫲嫲入院了．自星期二開始，自己的日常時間表都變得規律起來．皆因醫院嘅探病時間祗有下晝四點到八八點呢緊緊四粒鐘．於是乎每日嘅流程都祗係會由屋企出發去返工，放工就匆匆咁趕去醫院，離開醫院就去同一間食肆食晚飯，跟住就返屋企．呢個屋企．工作．醫院．屋企嘅循環加上愛人嫲嫲向下走嘅病情，今我諗起另外一個嘅循環．

光脫脫咁唻到呢個世界；受填鴨狂塞嘅教育；忙碌碌咁為兩口飯奔波；尋尋覓覓離離合合咁去搵在世嘅伴侶；儲儲埋埋果疊會扁值嘅銀紙同樓；跟手生一兩條化骨龍唻激自己；到頭來過無聊嘅退休生活；到離呢個世界時，又再回復光脫脫嘅模樣．

我信耶穌；唔信輪迴．但係無論你現在嘅境況係點，都祗係一個循環中嘅小節唻遮．可足憂傷呢？

懂得欣賞你

2005-11-06T16:49:00.000+08:00

朋友失戀了，多番思想，多番檢討。終於維持原判，都係自己錯。一段關係報銷，祗有一方出錯。No Way...

曾經見過一對老人家黃昏時份響維園拖住手散步，好甜蜜，好溫馨。究竟點樣先可以長相廝守，白頭到老﹖有竅門嗎﹖

要去挑剔，要去埋怨，要去翻舊賬，大容易了。你同我都一定識，呢一切對關係的建立絲毫無幫助。要一段關係長久保鮮，大概想是由"懂得付出．懂得欣賞"去開始。

甘心樂意的從自己開始去付出，從對方身上發掘各樣的好處去欣賞。像二人三足一樣，要不停的加油，不停的協調，戀愛的感覺才不會停下來。沒有一對二人三足的選手可以在彼此指責沒有鼓勵的環境下完全比賽．若果要話都係自己錯的話，倒不如問下自己點先可以唔再犯錯，仲好啦！

絕不討好

2005-11-05T13:33:00.000+08:00

生平好怕一種人，一種冇乜自知之名嘅人．

一個樣子唔太俊俏嘅人，祗要唔好咁誇張咁去整色整水．冇問題！
一個唔識講笑話嘅人，祗要唔好係唔係都講．冇問題！
一個唔太博學嘅人，祗要唔好成時扮代表賴淵博咁．都冇問題！

但係好奇怪，我身邊有一位人兄，特點如下：

佢唔型仔；但係佢覺得自己好有型．
佢嘅笑話好低Ｂ；但係佢覺得自己好幽默．
佢從來都祗有紙上談兵；做起上唻就偖多籍口．

最死穴果樣嘢就係，佢好鍾意冇嘢搵嘢講，見你忙到痺仲要走埋唻吹水．老實講，唔係唔想同佢吹水，真係忙到跳樓呀嘛！

我明白一樣米養百樣人嘅道理，但係奉勸各位千祈咪做上面果位人兄嘅呢種人．因為你將會絕不討好．

我老細

2005-11-04T19:18:00.000+08:00

記得以前細蚊仔嘅時候，好鍾意睇動物紀錄片．尤其喜歡獵豹在捕獵時果種計謀果種盤算；一方面要唔比獵物知道自己嘅存在，一方面又要慢慢迫近獵物．我覺得果種捕獵嘅神態好吸引．

當獵物失守時，獵物每每乜嘢都做唔到，祗有任由宰割地等候死神同佢講："Hello, Welcome to Hell!"

而我老細就剛剛係被擒獵物反常反應嘅教材．當佢知道現時嘅系統要被人吞併後，佢居然叫我去睇吓噬人者點樣可以先可以噬得舒服Ｄ兼唔洗黐牙，跟手話埋比噬人者知道牙咬嘅力度同入位嘅角度．能夠為獵食者提供近乎係殘廢套餐嘅享受，我不得不佩服我老細果種不合情理嘅表現．

唉，老細！
唉，腦細...

食多粒魚蛋

2005-11-03T17:40:00.000+08:00

好怕見到一個沉沉悶悶嘅Office，所以決心今日叫埋一眾酒肉朋友仔食吓Tea．情況如下：

魚蛋墨丸各一盤，
竹簽十數擱在旁；
酒朋肉友齊齊食，
開懷盡吃笑呵呵．

唔知道食完個Tea之後其他人心情會係點，若然仲係咁厭悶，咁就"食多粒魚蛋"啦！

有趣香港中文字

2005-11-02T09:18:00.000+08:00

最近响巴士站有一個保險公司嘅廣告，由好多個"病"字部嘅字，呢個廣告實在搶眼，睇完之後都覺得自己有Ｄ病病哋，可能係時候諗諗洗唔洗加多份保單．

話說回頭，中文字確實過引，除咗"病"字部之外，三點水同"金"字部都可以產生出好多有意思好貼切嘅字．當中文字唻到香港呢個講廣東話嘅地方，更多有趣嘅字就出現在，好似"唔","咗","嘅"等呢堆咁口語嘅字．接住唻嘅就係果Ｄ更有地道色彩嘅字，用嘅部首係"門"．你可以放好多唔同嘅嘢入呢度門裡面，比如"小","西","九","能","七"之如此類嘅字．以一個小小嘅部首去創作一連串用唔同角度去演譯嘅動作同埋不同嘅器官，不得不叫你佩服香港人嘅創意．

對唔住，我冇心叫你去忍受一堆粗口用字；但希望你可以欣賞一下那份屬於香港人嘅創意，屬於香港人嘅文化罷了．

好生意

2005-11-01T09:44:00.000+08:00

尋晚迫不得以地去搭的士，搭嘅距離大概係兩個地鐵站倒．

平日好少可咁短路程都走去搭的士，所以一上車講完去邊就先同果位司機大佬交代咗一聲："唔好意思呀，司機大佬，路程咁短"．誰不知佢哈哈大笑，我冷不提防佢有咁嘅反應覺得好好奇．佢跟手回我一句："傻啦！有得做總好過冇得做，話唔定去到又接到個長線客呢！"因為咁我同果位司機大佬居然起上唻．

雖然祗係十八蚊三分鐘嘅過程，但係上車同落車時候嘅心情居然可以完全唔同．抱住一個咪執輸嘅態度，落車嘅時候我加多咗句"好生意"，然後怱怱落車！我冇回身去望果位司機大佬嘅表情，但係我諗應該都唔會太差掛．

諗返轉頭，司機呢個行業都好辛苦，一更車係咁揸，又要面對塞車，又要望天打掛求好客．一個唔覺意接咗隻醉貓，隨時就一車都係嘔吐物，人工都蝕埋．我相信果位司機大佬同你同我一樣，都係搵食艱難嘅一群人，唔一定成日都好生意．但係帶住一句可以喜悅人心嘅說話响口邊都唔錯呀．

喂！老友，好生意呀！

斜視音樂

2005-10-31T20:02:00.000+08:00

放工嘅時候同隔離位同事講起而家聽MP3嘅問題．

同事覺得我比較古怪，因為我係買CD自己錄製MP3嘅人．點解呢？

我也曾係一個窮學生，响加拿大讀大學．果陣去買正版比香港價貴一倍左右，所以我都會去買翻版CD，一到兩星期一次，每次大概四至五隻．冇計，當時真係窮．每次有機會返香港方假，我都會去二手CD舖索返D二手CD返加拿大．每次返加拿大時，我都會有種莫明其妙嘅滿足，大概係唻自堆戰利品．

直至二千年回流香港工作，我認識咗一班新朋友，其中一個係全職幕後音樂人．响一次傾偈嘅時侯，佢無意中講起Ｄ唱片公司一向都拖創作人嘅數，其中有間前後差成三十萬，夾埋其他果Ｄ足足差成六十萬．用唻俾首期都夠．

當時我心裡面直角咁諗，如果我去買正版，咁Ｄ無賴唱片公司收到多Ｄ錢，就可以快快找清差創作人果Ｄ數，自始我就去買正版．係，可能我要花多Ｄ錢買CD，咁咪買少幾隻囉；但係我都有盡點力去令我位朋友同佢Ｄ同行唔洗揸兜呀．

各位斜視音樂嘅朋友，創作人都要食飯咖，快快趣趣去攪翻好隻眼，一齊唻正視音樂啦．

面對"歷史"

2005-10-30T22:44:00.000+08:00

今日一個人响屋企處理一堆積咗好鬼耐都未得手閒去搞嘅電腦數據的，悶極無聊聽ＣＤ．

ＣＤ機傳唻林億蓮嘅舊歌－寂寞流星群，忽然令我諗起公司裡面一個女同事嘅失戀故事．

我相信大部份人都面對過失戀，不論係飛人定比人飛，總有佢哋當中嘅理由．邊個先提出分手有傷勢八折甚至更低的優惠；反之另外果位就可能要咩住條九出十三歸嘅數，流晒淚喊晒口咁諗返果個大耳窿開頭點好點好，而後來又點衰點衰．

對唔住，我冇能力去教果位女同事點愛點愛，因為我而家都仲學緊．但係好老土地都要講返句，從來"歷史"都祗係會愛嚟讀，同埋用嚟比人日後做翻舊賬嘅証據(不論是好是壞)，"歷史"係唔會攞嚟喊嘅．無論你八九年六月有過幾熱血有過幾偒心，今日睇返轉頭又係乜嘢一回事呢？

究竟點樣先叫做"成熟"呢？我諗可能就係面對"歷史"時處理佢嘅一種態度罷了．呢種態度叫做"放手"，英文叫做"LET GO"．

"不要愛　無法愛上的畫　任我怎麼欣賞他　都不要到處掛！"　－節錄自寂寞流星群一曲

唔太習慣

2005-10-29T10:20:00.000+08:00

公司早前被收購，要再簽過份新合約，零六年一月一號生效．合約內容，擱下不表．

當中有人決定簽，亦有人決定納埋雞碎咁多嘅遣散費走．

走佬嘅人，我羨慕佢哋嘅勇氣，同時亦恭喜佢哋有新發展嘅機會；簽名留低嘅人，唯有繼續工作．士氣之低，前所未有．

走佬嘅人，雖然暫時未見得係好好；但係留低嘅人就真係唔太好，除左人手少咗工作多咗之外，仲要擔心埋搬去四方八面新地盤嘅適應．心情有如當年滯留香港的越南船民一樣－等遣返．一時三刻所有共事五年多嘅同事就好似被海關打擊翻版果Ｄ古惑仔一樣各散東西．

唔太習慣工作間一時間靜咗落唻；唔太習慣返工少咗趣味；唔太習慣要過祗要有"糧支"的生活．睇怕呢種唔太習慣嘅生活都要一段時間致可以適應落唻．

我好萌塞，現在我祗係想依然固我地做好件事多過想做完件事．

OHM"不"日記

2005-10-28T15:07:00.000+08:00

OHM日記終於見街，自問冇乜信心日日寫，索性改名成－OHM"不"日記．

有人話"老友"係响你就跌就跌果陣，加多腳，等你跌得甘Ｄ，反彈得高Ｄ，再企返隱之後，可以繼續向前行嘅人．我都希望可以延起胸膛一路向前行．

勞煩你哋幫我加多腳，等我行得好Ｄ，企得隱Ｄ，跑得快Ｄ，跳得高Ｄ啦．老友！

唔該晒！

OHM"不"日記

Dream Couple (下集上半場)

Dream Couple (上)

老友出走了 續集

第三次

老友出走了

我大個仔呀嘛～！

八二九．買咗樓

逃離德國．跳出６３

港生．女權

你有型．我有型

誰能明白我

黃昏的酒氣

背起十字架的人．背起十字架的心志

工作不滿測量器 (不是叮噹的法寶)

Times Up

人轉人．可惜並不人傳人

體諒

我像只海星

天堂與地獄的分別

成功?!

我心嗡了．我哭了

和諧小隊

半徑一米內的幸福

好幫人的肥傢伙 (連有答案的問答遊戲)

奴隸獸 之 我是幸福的男人

精英補習人．學做古惑仔

初五拜年仲未遲

保安的溝通技巧和要求

十四個汗臭男的晚上(打籃球)

老友送來的祝福

Terminator 的笑話

呢一刻五個最想去的地方

"I AM NOT ALWAYS RIGHT...

厭惡返工渴望放假症 (fm CYJOYCE)

新公司新制度...仲衰

食．玩．瞓

０６年的第一天

年終結算．吐佢口水

有個傻仔(2X)

冬 至

蛋撻看人緣

口 罩

私有化．唔到 [修正篇]

WTO的啟示

仲堅

如果...

可樂的鼓勵

在我眼中的公司

黑澤明的枱

內人眼中的公司

補鞋叔叔，好勁呀！

外人眼中的敝公司

數人頭

ＢＢ財務

不合理的採購

人肉電郵伺服器

心 願

蚊釘記(下)

蚊釘記(上)

今時今日

交 待

我是一只小小小小鴨

有冇咁橋呀？

AP小人物

太平紳士的工作

酒肉小組

準時收工

循 環

懂得欣賞你

絕不討好

我老細

食多粒魚蛋

有趣香港中文字

好生意

斜視音樂

面對"歷史"

唔太習慣

OHM"不"日記

老友出走了續集

奴隸獸之我是幸福的男人

冬　至

口　罩

心　願

交　待

循　環